سكان تحت الأرض
قصة انهارده هي حقيقية عن شخص اتجوز جنيه وسافر معاها لـ العالم بتاعهم ، قصة اتنشرت سنة ١٩٩٠ في كتاب سكان تحت الأرض والكاتب أكد أن القصة حدثت بالفعل
الحكاية بتبدأ في القاهرة سنة ١٩٦٠ مع شاب إسمه "محمد كامل ابراهيم جمعة" محمد كان طالب في كلية الطب ، كان عايش مع والدته في حاره من حواري القاهرة
في ليلة من الليالي كان راجع محمد من بره وقبل ما يفتح باب الشقة لقي أن فيه قطة قاعدة قدام الباب ، اول لما فتح الباب لقاها دخلت الشقة ، حاول يخرجها لكن الغريب أن القطة كانت بتعمل اصوات غريبة ، ومهما قرب منها مكانتش پتخاف او بتتحرك على عكس العادي في القطط
لكن الغريب انه استلطفها و قرر انه هيحتفظ بالقطة في الشقة وطلب من والدته تربيها وتعتني بيها ، الاغرب بقي أن القطة كانت ملازمة محمد زي ضله في اي مكان يروحه وعلى حسب الي اتنشر في القصة ديه انها كانت كل يوم بتستناه قدام باب الشقة لحد ما يجي من بره
محمد كان بالفعل اتعلق بالقطة وكان مبسوط بـ وجودها ، لحد ما فجأة اختفت القطة تماما بدون سبب ، دور عليها في كل مكان مش لاقي ليها أي أثر ، وقتها هو خمن انها خرجت الشارع زي باقي القطط ومش هترجع تاني ، لحد ما في يوم يرجع بيته ويتفاجئ بـ قطة قدام باب الشقة في نفس المكان الي كانت بتقف فيه القطة الي قبلها ، بس القطة ديه كانت مختلفة عنها
الغريب انها عملت نفس الحاجة ، اول لما فتح باب الشقة دخلت على جوا ومردتش تخرج ، ويعيد ويكرر نفس الي حصل ويعتني بالقطة الجديدة ويربيها ، بدأت هي كمان متفارقهوش في اي مكان بيروحه ،لدرجة انها كانت بتمشي وراه لحد الشغل بتاعه، ٤ سنين كاملين على هذا الوضع
لحد ما يجي يوم وتختفي القطة ديه هي كمان ، محمد حزن عليها جدًا لأنه كان متعلق بيها ، دور عليها في كل مكان مكنش ليها اي اثر ، لكن بعد فترة بدأ يتعايش عادي وينساها ، لكن بعد فترة صغيرة يرجع بيته والمره ديه يلاقي قطة تالته خالص مختلفة عن الاتنين الي قبلهم ، واقفة قدام باب الشقة في نفس المكان وبنفس الوضعية
لكن المره ديه استغرب شكل القطة الي كان مختلف عن اي قطة عادية ، لأن جمالها نادر و ونظراتها تشبه نظرات البشر!!
وقتها سأل نفسه هو اشمعنا انا بالذات الي كل وقت والتاني بيجيلي قطة قدام باب الشقة ؟..الموضوع مش طبيعي
لكن في النهاية قرر يربيها زي الي قبلها وعلى حسب كلامه انه كان حاسس انه يعرف القطة ديه
